黃偉民的前因後果20121021--改運第一步
唔好笑梁振英的民望低，台灣總統馬英九的最新民調，支持率只有13%，真是嚇你一跳。
梁振英，成功奪權，改變北京心意，贏得特首寶座，香港從此土共當家，贏了一場漂亮的建制內戰。可是執政百日，寸步難行，狼狽醜態，不堪入目。
他究竟在行好運，還是壞運？
馬英九，一生目標，就是總統大位。半生人謹言慎行，一塵不染。但是成功走入總統府，也是神話破滅的開始。
政治權力的成功史，偏偏是他歷史聲名的墓誌銘。
佢走的究竟是好運，還是壞運呢？
我們必須接受，我們的人生，是吉凶交雜的人生。
所以，路旁的算命師傅，不可以告訴你前程好壞，因為他的經歷跟你唔一樣，佢的價值觀，不等同你的價值觀。
天氣有冷熱，一日分晝夜，人總會經歷時運高低。運好，唔駛你教，條條大路通羅馬；但運差，又應該奌樣行止呢？
易經乾卦，有所謂潛龍勿用。龍喺水底，時機不備，所以勸你勿用。坤卦文言，有所謂，天地蔽，賢人隱。
孔子解釋，坤卦六爻皆陰，唔具備大有為嘅條件，君子唯有隱伏，儲存實力，靜待時機。
就好似，精神好，體能佳嘅時候，你當然可以選擇滑雪潛水；但係精神體能都欠奉嘅時候，你就只可以選擇睇書聽音樂等靜態活動。這個，就係順應時勢。
好多人問，命運可唔可以改變呢？
運氣唔可以改變，但行動選擇，卻操之在我。
天生腳部有問題，行動不便嘅人，堅持以踢足球為終生職志。然後，埋怨上天作弄，終生怨憤。這個，唔係命運嘅問題，這個，係選擇嘅問題。
一生人，重要嘅大決定，其實唔多，應該選擇，喺行好運嘅時候做決定；壞運嘅時候，沉著，等寒冬過去。這個，就係改運嘅最基本邏輯。
春夏秋冬，我地無法改變時序，但幾時播種，幾時耕耘，卻可以由我決定。
天意難違，命運，卻操之在我。
Search